IL VERO DERBY D’ITALIA!!!

Дерби натпреварите во Италија носат разни имиња. Некои од нив се градски, некои регионални. Некои имаат историска позадина, некои дури и политичка. Дуели за превласт, за реноме, некогаш само за честа на дресот. Сепак, еден натпревар ја има најголемата тежина. За него не смислиле некаков епитет, назнака, опис. Едноставно, доволно е да се каже дека играат Milan и Juventus и сите им е јасно дека се работи за вистинското Дерби на Италија – Il vero Derby d’Italia. Натпреварот за кој многумина пред почетокот на сезоната го предвидуваа како шлагерот на првенството. Мечот во кој ќе се одмерат двете најсилни екипи во Италија и двете екипи кои минатото првенство му дадоа печат на италијанскиот фудбал. Двата најтрофејни клуба во Италија и двата најголеми репрезенти на Калчото. И покрај целото свое значење, за жал, годинава пресметката е претворена во дуел на лидерот на табелата и најголемото разочарување во Serie A, па и во Европа. За жал, од многумина утрешното дерби е најавено како игра на мачка и глушец со поприлично извесен епилог. Сигурно никој од нас нема да се сложи со тоа. Ние во ова дерби гледаме прилика, и за своевидно и кратко детронизирање на шампионот, но и за неправдата од минатата сезона што нема така лесно да се заборави. Притисокот кај нас од мечот утревечер е неизбежен, исто и напнатоста и возбудата, но сите тие елементи пресликани на терен, кај оние најважните, нема исто да се осеќаат. Улогата на фаворит дефинитивно стои до името на противникот, а тоа, за овој реновиран тим на Milan може да биде пресуден фактор.

Дербито за првпат по цели 15 години ќе биде посиромашно за една жива легенда, по занимање тренер, а по вокација шампион. Негово знаење, умешност и голови им го подели на двата утрешни противници, иако за нас зачува малку повеќе :) Уште многу заеднички ѕвезди (иако противникот признава само 3 ѕвезди и ништо друго :) ), ама утревечер една ќе биде многу важна. Овојпат сеуште се работи за легенда во создавање, не радува(ше) и нас и јувентините и цела Италија. Maestro Pirlo, тие ќе го сакаат во елемент, ние соодветен на годините што ги има. Без сомнеж, многу работите ќе зависат директно од него, особено во перформансот на гостите. Сите ќе се сложиме дека Juve не е истата екипа со и без него. Изгледа бедно кога ние на сите маки се интересираме за недостатоците во играта на Juventus, ама очигледна е просечноста на тој тим без главниот диригент. И нема да објаснувам колку ќе значи негово маргинализирање на терен. Остатокот од екипата е опасен, моќен, ама не е генијален како mastermind-от.

Нашите проблеми се повторувани во секоја можна најава од третото коло, па наваму. И по 17 натпревари не е најден лекот за одбраната, така што нема да биде нелогично ако се констатира дека и воопшто го нема. Веројатно, решението е како да се компензира немоќната одбрана со средината и нападот, за кој греота е да се обележат како неквалитетни. Селекцијата на Max, чувството за правилен избор на играчот, формацијата, мотивацијата, па дури ако сакате и динамиката на играта, сезонава изостануваат. Тоа дефинитивно не е истиот тренер кој две сезони кубуреше со помалку од 20 здрави играчи. За утре најави нови промени, секако. Беше јасен околу 4-3-3 формацијата, што е логично за вака потешки натпревари. Извесно е дека ќе експериментира со Robinho во нападот, на десната страна. Во шпицот веројатно прв избор би бил Pazzini. Од другата страна, јасно, SES. Во средината се најавени Montolivo и NDJ, додека за третото место, она најлево, најголем кандидат е Nocerino, но нема да ме зачуди и одлуката Urby да почне таму. Во одбраната конечно комбинација која ќе се повторува! Ако се тече по предвиденото, Constant е без конкуренција на лев бек, Yepes и опоравениот Mexes би биле во средината, а десно, повторно Mattia De Sciglio.

Во пресрет на Дербито, управата прави напори да ја врати позитивната атмосфера. Финтите ги осмислил лично Berlo, се гледа од хеликоптер, од неговиот :) Двапати во две недели е премногу за во нормални услови. Нормални очигледно не се, но на дерби тоа најчесто не се гледа. Таму решава желбата и инспирацијата, а богами и судијата. За мене лично е супер што Rizzoli ќе го суди Дербито. Сите го знаат како судија наклонет кон противникот и многу луѓе реагираа на изборот. Баш тие реакции очекувам да го оптоварат, па да осеќа потреба да докажува нешто поинакво. All eyes on you, ref!

Одиме на победа момци, само победа!

FORZA MILAN!!!